رحلتي الى زيلامسي وكابرون عن طريق ميونخ




البداية كانت مع فيزه الشنغن وبسبب اني كسول رحت مكتب وطلبوا 850 على كل جواز يعني انا وزوجتي 1700 ريال دفعتها مع اني مستكثرها لكن قلت افضل يريحوني من دوشت طباعة الاوراق وتعبيتها وصفها وترتيبها ونسيت كذا ولا كذا ، طبعا شنغن المانيا صعب ولازم كل شخص يكون في حسابه 25 الف او حولها النمسا وهي المفروض اخذها بحكم اطول مدة بجلسها في النمسا لكن المكتب ما شجعوني مواعيدها تطول ويعطون مدة قصيرة وانا مقدم قبل رمضان بفترة بسيطة ورحلتي 28/6 معي وقت وخفت النمسا يعطوني شهر او شهر ونصف لذلك قلت خلوها على فرنسا والله يعيني على الحجوزات الوهمية من بوكينج ، بصمة في نصف رمضان وبعد ما استلمت الفيزة وحسبتها طلع تقريبا المكتب خذوا حوالي 150 ريال على كل جواز ، لان مطلوب تعريف بالراتب وكرت العائلة ولازم مترجمة والترجمة تكلف بحدود 70 ريال وانا اضفت تعريف بالراتب للمدام يعني حوالي 200 ريال ترجمة زائد حجز موعد في اي بي ما فيه زحمة بحدود 130 ريال للشخص يعني 200+250 = 450 ريال بالإضافة الى التأمين الطبي حوالي 80 ريال لك شخص خلنا نقول 150 ريال يصير الناتج 600 ريال زائد رخصة دولية بسعر 100 ريال يصير المجموع 700 ريال + رسوم السفارة للجوازين 670 ريال بعدها قلت يابلاش فكوني من ازعاج تعبيت النماذج وطباعتها .

حجز تذكرة الطيران الى ميونخ


طبعا حجز التذكرة قبل التقديم على فيزة الشنغن لانها مطلوبه من ضمن الاوراق تذكرة الطيران، وبحكم اني من الشرقية مطار الدمام مافيه رحلة مباشرة على ميونخ لازم ترانزيت ، احترت جدا في اختيار الرحلة السعودية لازم ترانزيت على الرياض او جدة ومدة طويلة لذلك شلتها من راسي الاتحاد حصلت سعر جيد لكن ما ارتحت لها تصير المدة طويلة سبق وجربتها على جنيف وتعبت من طول المسافة ، اطير من الدمام لابوظبي حوالي ساعة وشوي عكس اتجاه ميونخ وبعدها ارجع اطير من ابوظبي لميونخ واضيف على المدة ساعة وشوي لذلك شلتها من راسي قلت مافيه الا الخطوط التركية اربع ساعات من الدمام واريح في مطار اسطنبول حوالي ساعتين وبعدها ساعتين وشوي الى ميونخ اعجبني هذا الخيار لان اسطنبول مشتاق لها  وقلت فرصة ترانزيت مع فطور اسطنبولي وشاي وسميت وحلقوم ، مع ان التذكرة طلعت علي بحوالي 3 الاف للشخص ، خيار كان مناسب وموفق. 

الوصول لميونخ 


وصلنا ميونخ قدمت للجوازات الحجوزات الوهمية على فرنسا وعادي جدا قالنا الموظف رحلة سعيدة وعطانا جوازاتنا لاني كنت متخوف شوي من المانيا لاني سمعت بعض الاشاعات ان المانيا ماتقبل تكون اول محطة اذا فيزة الشنغن من دولة ثانية لكن طلع كلام فاضي ، مطار ميونخ بسيط وسهل ولافيه تعقيد، السواقة في ميونخ ممتعة وهنا موضوع تكلمت فيه عن السواقة في ميونخ

استأجار سيارة مطار ميونخ 



وفقني الله في افضل شركة لتأجير السيارات في مطار ميونخ الي هي شركة اوتو يورب هذا الموضوع تكلمت فيه بالتفصيل عن تجربتي مع اوتو يورب
سيارة مرسيدس فئة c  كلاس كامل المواصفات من شركة هريتز مع تأمين شامل من نفس شركة هيرتز بعد نسبة التحمل صفر في جميع الاحوال تماتيك جي بي اس بنزين ، وهيرتز ماياخذون وديعة الا مبلغ 200 يورو حسب كلام شركة اوتو يورب مع امكانية الالغاء لحد 48 ساعة من موعد الاستلام المدة 15 يوم ، بكل ماتعنيه الكلمة صفقة رابحة بنفس قيمة الاكسنت عندنا، استلمت سيارتي عطوني بي ام دبليو لان المرسيدس ماكان متوفر مع انها بنزين لكن ماتصرف من ميونخ لحد كابرون حوالي 200 كيلو صرفت ربع التانكي فقط. 

اول ليلة في ميونخ 



كانت اول ليلة في ميونخ في فندق موفنبيك مطار ميونخ وكان خيار مناسب موقعة قريب من المطار مرتب وفطورهم حلو، استغرب من الي ينزل مطار ميونخ ويتوجه مباشرة الى زيلامسي وهو توه جاي من رحلة دولية وتعب مطارات وممكن يكون ترانزيت ، اشوفها فكرة غير جيدة، بعد التعب تحتاج نومة حلوة وقومة الصباح بدري وفطور حلو مع كوب قهوة او شاي تمسك الخط وانت مرتاح وشبعان نوم حتى السفر يكون له طعم ثاني وانت مرتاح ، خصوصا ان المسافة ماهيب قصيرة لان خط الهاي وي ممكن يكون ثلث المسافة والباقي كله السرعة من 80 الى 100 ، لذلك نصيحتي اخذ فندق قريب من المطار وريح واذا افطرت وشبعت نوم توكل على الله الى زيلامسي. تقييمي لفندق موفنبيك مطار ميونخ ممتاز مريح مرتب سهل الدخول والخروج وفطورهم ممتاز وفي مكان الفطور حديقة جميلة.

الطريق من ميونخ الى زيلامسي 


الطريق من ميونخ الى زيلامسي هاي وي السرعة في الغالب 120 كيلو تقريبا ثلثين الطريق هاي وي وبعدها تدخل في طرق ريفية السرعة في الغالب 80 كيلو والجمال بتشوفه في الطرق الريفية اول ماحسيت اني دخلت النمسا مريت محطة واخذت ستكر الطرق لمدة 10 ايام بحوالي 10 يورو. 

الانترنت في زيلامسي 


نقطة نسيت اذكرها في البداية اخذت شريحة مسبقة الدفع من موبايلي وفعلت خدمة انترنت التجوال المفتوح لمدة شهر بسعر 350 ريال ، وبكل صدق انصح فيها بشدة ، حط الشريحة على احد الجوالات واشبك البقية منه ، وريح راسك من شراء الشرايح وتفعيلها وشحنها ومرة تضبط ومرة ماتضبط. 

الوصول لزيلامسي وكابرون



كان المشوار حلو واستمتعنا بالمناظر الخلابة خصوصا بعد ما دخلنا النمسا وزاد المشوار متعة اني كنت نايم بدري وشبعان نوم ، بكل صدق اندهشت من جمال النمسا وخصوصا زيلامسي وكابرون انا سبق وزرت انترلاكن وكنت اظن مافيه مكان بيكون اجمل من انترلاكن لكن غيرت رأيي هنا موضوع مقارنة بين انترلاكن وزيلامسي وش افضل انترلاكن او زيلامسي
وصلت شقتي ونزلت اغراضي وعلى طول كوب شاهي وعلى البلكونة ، يالله الجنة جمال الطبيعة عجيب ولايوصف بالكلمات.