وش افضل انترلاكن او ميونخ


المقارنة بين انترلاكن وزيلامسي

وش افضل انترلاكن او زيلامسي


سؤال دايم يتكرر وش افضل انترلاكن او زيلامسي ، او هل تنصحون بزيارة انترلاكن وزيلامسي في سفرة وحدة ، والكثير من التساؤلات والمقارنات بين زيلامسي وانترلاكن ، بحكم تجربتي وزيارتي لانترلاكن ولزيلامسي بكتب عن المدينتين واقارن بينها بكل حيادية ، وطبعا المقارنة من وجهة نظري الشخصية.

ما هو الافضل انترلاكن او زيلامسي


 خلونا نتكلم عن وجه الشبه بين انترلاكن وزيلامسي ، كلها في منطقة جبال الالب وهي من اجمل المناطق في العالم من ناحية الطبيعة كل المدينتين جبلية ومرتفعة وكل المدينتين تقع على بحيرات وكل المدينتين مع الغيم تصير سبحان الخالق كأنها رسمة في لوحة من شدة جمالها وبعد كل المدينتين بدون الغيم خصوصا الظهر تصير كأنك في شواية من حرارة الشمس ولله الحمد ان اجوائهم دايم غيم ومطر وحتى لو فيه شمس ما تطول،  وكل المدينتين ما تقدر تلحق النشاطات والفعاليات الي فيها كلها قمم وتلفريك ومطلات وزحاليق..  الخ.

وش افضل السفر لزيلامسي او انترلاكن ؟

وش افضل انترلاكن او زيلامسي


بحكم تجربتي للمدينتين انصح بالسفر لزيلامسي بدون اي تردد ، ليه ؟ اقولك ليه اول شيء زيلامسي ارخص من ناحية السكن واجمل شققهم كثير منها راقية وحديثة في انترلاكن الغالبية تكون نظام اوروبي تقليدي واسعارها نار ، المعيشة زيلامسي ارخص وافضل، المطاعم العربية كثيرة واسعارها غالية لكن ما تقارن في انترلاكن في انترلاكن تقريبا الضعف والخيارات في انترلاكن محدودة والوقت مشكلة لازم قبل الساعة سبع تكون مخلص امورك كلها من المطعم او البقالة اما زيلامسي وكابرون يا سلامي عليهم تجي الساعة تسع والمطاعم العربية والبقالات العربية فاتحة ومعك دايم وقت والمطاعم العربية يعتبر مستواها جيد جدا عكس انترلاكن مستوى المطاعم عندهم ضعيف تخيل تدفع لشخصين حوالي 300 ريال والاكل تتغصب فيه الله يعز النعمة.

وش اجمل طبيعة انترلاكن او زيلامسي


من ناحية الطبيعة تعتبر متقاربة جدا وبعض الاوقات احس ان زيلامسي وكابرون اجمل من انترلاكن لكن بشكل عام الطبيعة ما تختلف بشكل كبير وفيه نقاط تحسب لزيلامسي مع جمال الطبيعة الطرق واسعة والمواقف متوفرة في كل مكان عكس انترلاكن ، زيلامسي اغلب فعالياتها قريبة من بعض التلفريك كثيرة وكلها اما تطلع من زيلامسي او من كابرون وكابرون تعتبر جزء من زيلامسي الي بينهم حوالي 8 كيلو.

هل ينصح بزيارة انترلاكن وزيلامسي في سفرة وحدة؟


من وجهة نظري ما انصح لعدة اسباب اول شي الطبيعة متشابهة لحد التطابق ثاني شي المسافة بينهم بعيدة قرابة 500 كيلو ، ثالث شي من الناحية المالية زيلامسي بتكلفك اقل من انترلاكن سكن مطاعم بقالة كوفي شوب مخبز.. الخ ، ومن ناحية مالية اخرى لو سكنت في فندق او شقة توفر بطاقة زيلامسي كابرون بيصر عندك بس تدفع للمطعم فقط لان كل الفعاليات تدخلها مجانا ، لكن لو كنت مصر انك تشوف المدينتين بنفسك انصح تكون سفرتين مختلفة واذا مصر تزورهم في سفرة وحدة خل الوصول جنيف والمغادرة ميونخ او العكس ، والافضل تختار قرية او مدينة تكون في نصف الطريق تريح فيها ليلة ، لان مسافة 500 كيلو ممكن تشوفها بسيطة انا معك لو كان خط هاي وي لكن في اوروبا صعب تحصل هاي وي لمسافات طويلة لابد تدخل مدن او قرى او طرق جبلية وتصير السرعة 80 وبعض الاوقات 50 كيلو وبتصير 500 كيلو تحتاج قرابة 8 ساعات او اكثر حتى توصل.